Som oppfølging av læreplanverka for den 10-årige grunnskulen har departementet gjeve ut rettleiingar og idéhefte for arbeidet på ulike område og fag. Sjølv om måla og innhaldet gjeld for grunnskulen generelt, må opplæringa i udelte og fådelte skular organiserast og tilpassast på andre måtar enn i fulldelte skular. Det har derfor vore eit ønske om å få gje ut eit idéhefte som tek for seg organiseringa av arbeidet i dei udelte og fådelte skulane.

Siktemåla med dette heftet er:

1. Det skal vere til hjelp og støtte i arbeidet med å realisere læreplanverka i udelte og fådelte skular.

2. Nye lærarar skal få ei innføring i arbeidet i udelte og fådelte skular.

3. Heftet skal stimulere til drøfting og refleksjon, og inneheld oppgåver med sikte på dette. Drøftinga bør skje på kvar enkelt skule, og gjerne også i samarbeid mellom skular.

Arbeidet med idéheftet er lagt opp i samråd med Landslaget for Udelt og Fådelt Skole (LUFS). Hefte er utarbeidd i samarbeid med Høgskulen i Sogn og Fjordane (HSF). Førstelektor Kristoffer Melheim har stått for arbeidet med å redigere heftet.

Heftet er ikkje meint å vere ei "kokebok" for arbeidet i fådeltskulen. Meninga er å gje idear til dette arbeidet. Vi vonar òg at dei praktiske døma frå ulike skular kan vere til nytte for arbeidet i udelte og fådelte skular kring om i landet. Dette gjeld òg dei skulane som arbeider etter L97 Samisk.

Vi takkar alle som har vore med og gjeve innspel til arbeidet.

Oslo 2000.